Fæddist 1947 á Þórshöfn á Langanesi. Eftir gagn og gaman í Barnaskóla Vestmannaeyja og heilmikið fjör  í gagnfræðaskólanum þar, sem lauk með gamla góða landsprófinu, settist minn maður á virðulegan skólabekk í MR og slapp þaðan með stúdentspróf úr stærðfræðideild.

Lagði síðar stund á rafmagnsverkfræði við tækniháskólann í Aachen í Þýskaland þar sem Karlamagnús sat á tróni tveimur mannsöldrum áður en Ísland var numið. Útskrifaðist sem Diplom-Ingenieur á sviði Nachrichtentechnik.  Starfaði svo um eins og hálfs árs skeið við það sem hann hafði lært – einkum við hönnun á smágervum rökrásum, svonefndum samrásum (integrated circuits).

Árið 1979 hóf drengurinn störf í í tölvudeild Kristjáns Ó. Skagfjörð hf. og vann þar við forritun, sölu og markaðssetningu á hinum frábæru „mini“-tölvum frá Digital Equipment Corporation (DEC) – blessuð sé minning þeirra. Þetta voru dálítið dýrlegir tímar!

Árið 1992 setti hann á stofn Ormstungu ásamt Sigurjóni Magnússyni, rithöfundi, sem sneri sér reyndar fljótlega að skáldskapnum (með frábærum árangri) og leiðir skildi. Síðan hefur Gísli lengstum starfað einn í forlaginu og komið að nánast öllum þáttum útgáfunnar, svo sem ritstjórn, prófarkalestri, umbroti, sölu og markaðssetningu, dreifingu, innheimtu, bókhaldi og vefsíðugerð.

Nú hafa tæplega hundrað bækur forlagsins glatt geð landsmanna, og bókmenntatímaritið Jón á Bægisá sem sérhæfir sig á sviði þýðinga og þýðingafræða kemur út næstum reglulega. – Þetta eru nú líka dálítið dýrlegir tímar!