Árið 1979 birtist fyrsta bók Kristins, ljóðabókin Inní skóginn, rituð undir pennanafninu Krói. Nokkrar smásögur eftir hann hafa birst í blöðum og tímaritum eða verið lesnar í útvarp.

Hann hefur þýtt þrjár skáldsögur eftir spænska höfunda. Þær eru:

Paskval Dvarte og hyski hans (Vaka-Helgafell 1988) og Býkúpan (Vaka-Helgafell 1991), báðar eftir nóbelsskáldið Camilo José Cela, og Refskák eða Bríkin frá Flandri (Ormstunga 1996) eftir metsöluhöfundinn Arturo Pérez-Reverte.

Fyrsta frumsamda skáldsaga Kristins, Fjölmóðs saga föðurbetrungs, kom út hjá Ormstungu 1996. Pósthólf dauðans (Ormstunga 1998) er önnur skáldsaga höfundar. Kristinn hefur sjálfur þýtt og endurritað báðar sögurnar á spænsku.

Sagan um Fjölmóð kom út í Barselónu í mars 2005 og nefnist á spænsku La Saga de Fiólmod el Intrépido. Sagan var upprunalega skrifuð á óvísindalegri forníslensku enda gerist hún á 12. öld á Íslandi, á Spáni og í öðrum heimum. Við þýðinguna/endurritunina hefur Kristinn R. leitast við að fyrna málfarið svolítið líka og sótt talsvert í smiðju Don Kíkóta eftir Cervantes í því sambandi.

Vorið 2003 kom sagan Pósthólf dauðans (Epitafio) út hjá bókaforlaginu Brosquil, einnig í þýðingu og endurritun höfundarins sjálfs. Hann hefur sömuleiðis verið viðriðinn útgáfu þriggja norrænna smásagnabóka á Spáni enda starfar hann í hópi norrænna þýðenda í Madríd. Hann valdi og þýddi íslensku smásögurnar í þessar bækur. Þær eru: „Hijas del frío“ (Kuldans dætur) með smásögum kvenna á 20. öld, „El vikingo afeitado“ (Rakaði víkingurinn) með sögum eftir karlmenn og „Historias desde el hielo“ (Sögur af ísnum) með norrænum smásögum fyrir börn. Hann hefur líka þýtt spænskar bókmenntir á íslensku, m.a. eftir spænska Nóbelsskáldið Camilo José Cela.